التاج ده بالنسبة ليا جميل ومهم جداااااا أولا جميل لأنه في أسئلة ممكن تكون بتكشف الشخصية شوية ثانيا مهم جداااا لأنه واصلني من ناس مهمة جدااااا
وما أقدرش ما أجاوبش عليه وربنا يستر.
1- قالولك اختار عصر من عصور مصرعلشان تعيش فيه تختار عصر اي حاكم ؟
أحب أعيش في عصر سيف الدين قطز لأني بحس أنه فعلا عصر حكم إسلامي وعصر جهاد.
2- اول اولويه في حياتك عيلتك ولا شغلك ولا اصحابك ؟
كل واحد له أهمية خاصة عندي وكل واحد على حسب ظروفه.
3- ايه اكتر حاجه بتحبها في رمضان ؟
جو الالتزام الموجود في الشوارع وان كان اوشك على الاختفاء في رمضان اللي فات وبحب جدااا الاعتكاف والتهجد.
4- اوصف اجمل افطار ممكن تفطره ؟
أجمل إفطار ممكن افطره في بيتنا.
5- لو انت حاكم علي مجموعه من الافراد حتكون عادل ؟ طب هتتأ كد ازاي انك حاكم عادل ؟
لو أنا حاكم على مجموعة من الأفراد هبذل أقصى جهدي علشان أكون عادل لكن هتأكد إزاي دي صعبة شوية لأني مهما عملت أكيد مش هعجب الناس كلهم لكن هحاول بقدر إني أكون عادل.
6- مين اكتر اعلامي في مصر بتحترمه ؟
إعلامي في مصر بحترمه !!!! مش عارف لكن ممكن يبقى وائل الإبراشي.
7- لو ممكن تشتغل شغلانه تانيه كنت تتمني تبقي ايه ؟
8-
أشتغل في برمجة الكمبيوتر أو تصميم صفحات الانترنت لأني دي من الحاجات اللي بحبها جدااا.
9- ايه تاني بلد تتمني تعيش فيها بعد مصر ؟
اكتر بلد أتمنى اعيش فيها بعد مصر هيا فلسطين.
10- اوصف ترتيبات اجمل فرح ممكن تحضره؟
مش بحب أحضر أفراح خالص ومش معنى ذلك اني بحب الكآبة لكن ممكن اروح أسلم وأمشي.
11- بتراعي كلام الناس والقيل والقال ؟ ولو اه او لا قول ليه؟
مش براعي كلام الناس القيل والقال ولكن ممكن كلام الناس يؤثر فيا نفسيا.
12- صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنه هتكون سعيد؟
أعتقد إني لو صحيت من النوم ماليقتش الحاجة دي ممكن يبقى أخر يوم في حياتي.
13- عندك امل ؟ اسبابك؟
الحمد لله عندي امل وثقتي في الله كبيرة وأنه لن يخذلني.
14- لما بتحب تهرب من كل شيء بتروح فين ؟
أروح مكان هادئ جدااا.
15- بتشرب سجاير ؟وايه شعورك لما ست او راجل بيشرب سجاير وليه؟
الحمد لله لا لكن لو راجل شرب قدامي لو جات فرصة أكلمه بكلمه لكن لو ست مش بطيق أشوفها أصلا.
16- بتعرف ايدك اليمين من الشمال ازاي ؟
مش عارف والله ما جربتش افرق بينهم.
17- ايه اكتر اله موسيقيه بتحبها ؟
مش بعرف في الآلات الموسيقية أوي لكن بحب الأناشيد اللي بموسيقى.
18- ايه الحاجه اللي لو حصلت هتبقي سعيد اوي؟
مش عارف حاجة معينة لكن في حاجات كتيرة أوي نفسي تتحقق.
19- تحب يبقي عندك ارض زراعيه ولا عربيات ولا كام عماره ولا فلوس في البنك ؟
أكيد أحب كل ده بس أهم حاجة ما ابخلش على الفقراء.
20- البحر ولا النيل ؟
بحب البحر أكتر.
21- مركب ولا طياره؟
الطيارة .
22- مجنون ولا عاقل ؟
ليه الإحراج ده لكن ساعات مجنون أوي وساعات عاقل أوي.
23- تقرا كتاب ولا تتفرج علي فيلم ؟
على حسب الظروف بس فيلم أكتر.
